«Ծնողական ժամ» նոր սոցիալական երաշխիք ՀՀ աշխատանքային օրենսգրքում

ՀՀ Ազգային ժողովը երկրորդ ընթերցմամբ ընդունել է ՀՀ աշխատանքային օրենսգրքի փոփոխությունները, որոնցով աշխատանքային օրենսդրությունում ներդրվում է նոր սոցիալական երաշխիք՝ «ծնողական ժամը»։

Փոփոխությունների նպատակն է աջակցել աշխատող ծնողներին՝ ստեղծելով աշխատանքի և ընտանեկան պարտականությունների համատեղման առավել բարենպաստ պայմաններ։

Նախագիծը դրական արձագանք է ստացել ինչպես հասարակության, այնպես էլ պետական մարմինների կողմից։

Ովքե՞ր կարող են օգտվել ծնողական ժամից

Ծնողական ժամից կարող են օգտվել՝

• մինչև 12 տարեկան երեխա ունեցող ծնողները (այդ թվում՝ խնամատար ծնողները, որդեգրողները և խնամակալները),
• մինչև 18 տարեկան հաշմանդամության խորը կամ ծանր ֆունկցիոնալության աստիճանի սահմանափակում ունեցող երեխա ունեցող ծնողները։

Ծնողական ժամի տևողությունը

Օրենքով նախատեսվում է՝

• մինչև 2 երեխա ունեցող ծնողներին տրամադրել օրական առավելագույնը 30 րոպե,
• 3 և ավելի երեխա ունեցող ծնողներին՝ օրական առավելագույնը 1 ժամ,
• մինչև 18 տարեկան հաշմանդամության խորը կամ ծանր ֆունկցիոնալության աստիճանի սահմանափակում ունեցող երեխա ունեցող ծնողներին՝ օրական առավելագույնը 1 ժամ՝ անկախ երեխաների թվից։

Գործատուների համար կարևոր հետևանքներ

Ծնողական ժամը տրամադրվում է աշխատողի գրավոր դիմումի հիման վրա, և գործատուն իրավունք չունի մերժելու դրա տրամադրումը, եթե առկա են օրենքով սահմանված պայմանները։

Ծնողական ժամը ներառվում է աշխատաժամանակում։

Ծնողական ժամի ընթացքում պահպանվում է աշխատողի հիմնական աշխատավարձը։

Աշխատողի ցանկությամբ ծնողական ժամը կարող է տրամադրվել նաև մասերով (օրինակ՝ 30 րոպե աշխատանքային օրվա սկզբում և 30 րոպե աշխատանքային օրվա վերջում)։

Հետևաբար, գործատուները պետք է վերանայեն իրենց ներքին ընթացակարգերը, աշխատաժամանակի հաշվառման կանոնները և համապատասխան HR փաստաթղթերը՝ նոր կարգավորումներին համապատասխանեցնելու նպատակով։